1 Kings 15
1 以色列王耶羅波安在位个第十八年，亞比雅做猶大王。
2 佢在耶路撒冷統治三年。厥姆安到瑪迦，係押沙龍个妹仔。
3 佢犯到㧯厥爸共樣个罪，無像厥太大衛恁樣一心一意在上主—佢个上帝面前忠心。
4 總係為到大衛个緣故，上主—佢个上帝給亞比雅一個孻仔，來承接佢做王，使大衛个王朝在耶路撒冷毋會斷掉，又堅固耶路撒冷个安全。
5 上主恁樣做係因為大衛行上主看做著个事；除了赫人烏利亞該件事，大衛一生人毋識違背上主个命令。
6 亞比雅還生个時，羅波安㧯耶羅波安常常戰爭。
7 亞比雅其他个事全部記在《猶大列王史》底背。亞比雅㧯耶羅波安常常戰爭。
8 亞比雅死掉，葬在大衛城。佢个孻仔亞撒承接佢做王。
9 以色列王耶羅波安在位个第二十年，亞撒做猶大王。
10 佢在耶路撒冷統治四十一年。厥婆安到瑪迦，係押沙龍个妹仔。
11 亞撒像厥祖先大衛恁樣行上主看做著个事。
12 佢將所有在神廟肚个男娼全部逐出去國外，又將厥祖先所造个偶像全部除掉。
13 佢廢掉厥婆瑪迦太后个名份，因為太后為亞舍拉女神造邪淫个柱像。亞撒將女神像斬斷，在汲淪溪滣燒掉。
14 雖然亞撒無將所有在山岡頂个神廟廢掉，總係佢一生人一心一意在上主面前忠心。
15 佢將厥爸㧯自家奉獻給上主个東西，就係金銀㧯用品，全部放在聖殿肚。
16 猶大王亞撒㧯以色列王巴沙在位个期間，常常戰爭。
17 巴沙愛攻打猶大，就修建拉瑪做防衛城，目的係愛切斷出入猶大所有个交通。
18 所以亞撒將聖殿㧯王宮寶庫還賸个金仔㧯銀仔全部拿走，交給佢个大臣，帶去大馬士革，到他伯利門个孻仔、希旬个孫仔敘利亞王便‧哈達該位。亞撒个大臣帶佢个話去，講：
19 「若爸㧯吾爸以前係同盟，𠊎等也來立約做同盟。這兜金仔㧯銀仔係送給你个禮物。請將你㧯以色列王巴沙个盟約廢掉，佢正會對𠊎个土地將軍隊撤走。」
20 便‧哈達同意亞撒王个建議，就派佢个元帥去攻打以色列个城市。佢等佔領以雲、但、亞伯‧伯‧瑪迦、加利利湖附近个地區、㧯拿弗他利全地。
21 巴沙聽到所發生个事，就黏時停止修建拉瑪个工程，退轉得撒去。
22 所以，亞撒王向全猶大發出命令，規定逐儕全部愛來協助將巴沙用來修建拉瑪个石頭㧯樹料運走，毋准有人推辭。亞撒王用這兜材料在米斯巴㧯便雅憫个迦巴起防衛城。
23 亞撒其他个事，佢个勇敢㧯建設城市个功勞，全部記在《猶大列王史》底背。佢年老个時，因為腳發病變做跛腳。
24 亞撒死後，葬在大衛城个王室墳墓肚。佢个孻仔約沙法承接佢做王。
25 猶大王亞撒在位个第二年，耶羅波安个孻仔拿答做以色列王。佢統治以色列兩年。
26 佢像厥爸共樣犯罪，行上主看做邪惡个事，害以色列人陷在罪惡當中。
27 以薩迦族人亞希雅个孻仔巴沙造反拿答，在拿答㧯佢个軍隊圍困非利士个基比頓城个時，巴沙將佢㓾掉。
28 這事發生在猶大王亞撒在位个第三年。巴沙承接拿答做以色列王；
29 佢一做王就將耶羅波安家族个人㓾淨淨。照上主通過佢僕人示羅人亞希雅先知所講个，耶羅波安家族个人全部被人㓾死，無留一個。
30 這係因為耶羅波安自家犯罪，又害以色列人陷在罪惡當中，惹上主—以色列个上帝發譴。
31 拿答其他个事全部記在《以色列列王史》底背。
32 猶大王亞撒㧯以色列王巴沙在位期間，常常戰爭。
33 猶大王亞撒在位个第三年，亞希雅个孻仔巴沙做以色列个王。佢在得撒統治二十四年。
34 佢像耶羅波安共樣犯罪，行上主看做邪惡个事，害以色列人陷在罪惡當中。